Cinemastercard kinoteatrlar şəbəkəsinin Gənclik Mall-da yerləşən Dolby Atmos zalında Vətən müharibəsi şəhidi İsmayıl Kərimlinin həyatı və döyüş yolundan bəhs edən, rejissor Səməd Mehriban Ağayevin “İsmayıl məqamı” sənədli filminin nümayişi keçirilib.

Filmin nümayişindən əvvəl şəhidin anası Rəna Kərimova və rejissor tədbir iştirakçılarını salamlayıblar. Rəna Kərimova çıxışında filmdə adi bir Azərbaycan oğlunun Vətəni uğrunda nəyə qadir olduğunu görməyin mümkün olduğunu bildirib.

Təqdimatda şəhid anaları, “YAŞAT” Fondunun əməkdaşı Elşad Ələkbərov, Abdulla Rəhimov adına 247 nömrəli tam orta ümumtəhsil məktəbinin direktoru Sitarə Abbasova, məktəbin pedaqoji heyəti, valideynləri və şagirdləri, o cümlədən şəhid İsmayıl Kərimlinin adını daşıyan VIII “A” sinfinin şagirdləri iştirak ediblər. Həmçinin Famil İsgəndərov adına 157 nömrəli tam orta ümumtəhsil məktəbində şəhidin adını daşıyan sinfin şagirdləri və sinif rəhbəri də nümayişə qatılıblar. Tədbirdə şəhidin qardaşı Rəvan Kərimli və bacısı Nuriyyə Kərimli, məktəb və universitet yoldaşları, qonşuları, eləcə də ailə üzvlərinin iş yoldaşları da iştirak ediblər.

Tədbirin sonunda şəhidin atası Ceyhun Kərimov, anası Rəna Kərimova, İsmayıl Kərimlinin döyüş yoldaşları və filmin rejissoru Səməd Mehriban Ağayev tamaşaçılar qarşısında çıxış edərək filmin ərsəyə gəlməsi, şəhidin döyüş yolu və xatirəsinin yaşadılması ilə bağlı fikirlərini bölüşüblər.