Milli Kino Günü münasibətilə keçirilən tədbir çərçivəsində CineMastercard kinoteatrlar şəbəkəsi “Tağıyev: Çar” filminin yaradıcı heyətinə təşəkkürünü ifadə edib.

CineMastercard kinoteatrlar şəbəkəsinin Baş direktoru Zaur Darabzadə adından filmin rejissoru Zaur Qasımlıya təşəkkürnamə təqdim olunub. Təltif “Tağıyev: Çar” filminin 2025-ci ildə CineMastercard kinoteatrlar şəbəkəsində “Ən çox izlənilən Azərbaycan filmi” adına layiq görülməsi, Azərbaycan kinosunun inkişafına verdiyi dəyərli töhfə və tamaşaçılara bəxş etdiyi yaddaqalan ekran əsərinə görə təqdim edilib.

Çıxışı zamanı Zaur Darabzadə filmin ərsəyə gəlməsində əməyi olan bütün yaradıcı heyətə, xüsusilə də layihənin istehsalçısı olan Baku Media Center komandasına minnətdarlığını bildirib. O qeyd edib ki, bu cür irimiqyaslı ekran əsərləri milli kinomuzun inkişafına, tarixi irsimizin təbliğinə və Azərbaycan filmlərinə tamaşaçı marağının artmasına mühüm töhfə verir.

Rejissor Zaur Qasımlı göstərilən diqqətə görə təşəkkürünü bildirərək, bu uğurun filmin ərsəyə gəlməsində əməyi olan bütün yaradıcı heyətin birgə əməyinin nəticəsi olduğunu vurğulayıb.

CineMastercard kinoteatrlar şəbəkəsi bundan sonra da yerli filmlərin daha geniş auditoriyaya çatdırılması və Azərbaycan kinosunun inkişafına yönəlmiş layihələrə dəstəyini davam etdirəcək.